WiLdBiRd

Saturday, August 25, 2007



ضعيفة أنا كورقة شجر فى ليالى الخريف
حائرة على دروب حياة يملؤها الزيف
تتجسد أفكارى وتساؤلاتى على مرآة
نفسى
تطاردنى فى عتمتى ونورى كخيالى الشريد

تعود فتسألنى ماذا فعلت بكل الوان الزهور
بكل انواع العطور

صبغتها بها اشكال ودنيا
متناسية اسود الذبول

لون اسود واخر ابيض يملئان وجودك

تغتال الدنيا احلامك
تشنقها فوق الاف الحبال
كل يوم تقفدين اشياء
وتضيع منك اخرى

وانت غارقة فى غرفتك
حبيسة جدرانك

تمنعك اسوراك
من مجرد فكرة الخروج

اخترتى حلمك بالوانه
ونسيت خلف السور نور

شمس ساطعة وقصور

تلال خضراء
ملمس الندى والزهور

العصافير التى تدركين صوتها

ولا ترينها

فضلت خيالاتك على بشر بارواح وشعور

ولكن اى شعور

ماعاد فى الدنيا مايذكر عن المشاعر غير حروف

سطرت بيد كاتب او شاعر مغمور

او انفاس ثكلى على من فى القبور

posted by WiLdBiRd at 4:48 AM 16 comments

Sunday, August 12, 2007

تاج

جااااااااالى تاج

من
جميلة بوحريد
ماعلينا


الف شكر ليها
انا من اول مادخلت عالم المدونات وانا بسال اية التاج ده

وللى مش عارف

هو مجموعة اسئلة بتمرر وبيجاوب عليها المدون

بما انى بعتبر نفسى دلوقتى واحدة من المدونين
D:

بس تستحملوا بقى علشان انا بتكلم كتيييييير


يللا نبدأ

اسم مدونتك؟
wildbluebird

لماذا اخترته... ومانيتك وراء اختياره؟

أولا علشان انا بحب الطيوراكيد
بس بجد احساس انك تبقى طاير
مافيش حواليك غير الهوا بس ورجليك مش لامسة الارض
احساس رائع
مع انى ماعشتهوش بس حسيته
:)
يعنى ماجربتش اطير قبل كده

بقى wild
اولا انا كان اسمى
lovelybird
ودلوقتى وايلد

ده مش تغيير فيا
بس انا بعتبر انى اوقات ممكن يكون فيا الشئ ونقيضه

بس النقيض اللى يحفظ التوازن الطبيعى
يعنى انا مش على طول لافلى
اوقات ببقى ببقى شرسة يعنى
لكن سيبكوا من كل ده

علشان العصفور الامور العضاض اللى اختى اديتهولى

معلش برضوه مش عارفة احط صورته فى الموضوع

هابقى احطها فى جنب المدونة

صورتك فى المدونة رمزيتها؟

فى الاول كنت حاطة صورة حمامة زرقاء وعنيها حمراء

كانت بالنسبة لى غريبة ومخيفة

بس شيلتها وحطيت الصورة اللى انتوا شايفنها دلوقتى

طبعا واضحة


هل فكر ت فى اغلاق مدونتك والسبب؟

اه فكرت كتير

لما بقعد فترة كبيرة مش بكتب

وده اما بسبب الوقت او بسبب انى مترددة شوية

حد قل ادبه فى التعليق..اية رد فعلك؟

هتضايق جدا لانى معتقدش انى هاكتب مواضيع ممكن الرد عليها يكون سئ للدرجة دى
بس لما توصل لكده
يبقى اكيد هديليت التعليق
وده ممكن يبقى سبب للسؤال اللى فوق
انى اقفل المدونة


اسوأ مدونة؟

انا بفضل ادخل من هنا لهنا وادور فى المدونات
اكيد بوصل لمدونات افكار اصحابها مش تمام يعنى

هايحصل اية للايميل لما تموتى؟

هيموت بعدى بشهرين

اديتى الباسورد لحد قبل كده؟

لا
بس ايميل اتاخد منى قبل كده بحركة هاكر هزار
بس اتضايقت اوى لانى بعتبره حاجة شخصية
مش لازم يكون فيها اسرار
زى شنطة ايدى بعتبرها حاجة شخصية يعنى مش اى حد يبص فيها

اسمك؟

هبه

عمرك؟
22

كبرت اوى انا عارفة

برجك؟

لو علشان حظك اليوم يبقى مش هاقول
:)

مجال دراستك؟

طب بشرى انتوا مش شامين ريحة جث ولا بنج

السفر بالنسبة لى؟


من اول الصحبة حتى لو كنت لوحدى

البيوت
الاراضى
الكبارى
النيل
البحر
الجبال

المحطات اللى بنزلها لو راكبة قطر
البلد اللى رايحها بناسها

كل ده غير السبع فوايد

;)

يعنى بستمتع بكل لحظة فيه


المود بتاعك؟

ممكن كتير يبقى عكس اللى جوايا
يعنى مبسوطة اغلب الوقت
علشان مابحبش اضايق حد

وقت فراغك بتعملى فيه اية؟

مش هاقول النت علشان النت فى كل الاوقات
لكن اشوف صحباتى
اروح لتيتا وخالاتى
اخرج
اتعلم حاجة جديدة


الاكلة المفضلة؟

بمووووووت فى البسلة


الصفات اللى اخدتها من بابا؟

الروح
مش عارفة هى التركيبة كده واحدة

اللى كان نفسى اخده

هدوء بابا ودبلوماسيته فى التعامل مع المواقف

الصفات اللى اخدتها من ماما؟

دماغى ناشفة اوى


اكتر ست حاجات بكرهها؟

الخيانة

الظلم

الكدب

التكبر

التطنيش

ولما حد يفتكر انه هيستعبطنى

لماذا دخلت عالم التدوين من الاساس؟

اولا بداية معرفتى بالمدونات كان عن طريق بابا
كان عنده برنامج اسمه

deebo reader

كان دايما يقولى ابقى نزليه عندك
بدات اتابع بعض المدونات
وحبيت اشارك
حسيت انى عندى كلام كتير
لكن حتى الان المواضيع اللى اتنشرت اقل من اللى المحفوظة

أحلى جملة قيلت فى وصف مدونتك؟

هى ماكانتش فى وصف المدونة
لكن عن التدوين عامة
وان اللى هستفيده منه احساس المشاركة وده اللى انا عاوزاه


التعليقات بالنسبة لك أهميتها؟

مهمة طبعا
كل كلمة اتقالت كرد سواء معايا او ضدى او نقد ليا بطريقة كويسة
انا برحب بيها
وتعنى لى كتير


أحلى بوست كتبتيه؟

مافيش بالنسبة لى احلى
لانى عامة مش بكتب مواضيع فى مجله
يعنى انا مش صحفية
انا بكتب عن نفسى
فبالتالى كل موضوع له اهميته


أفضل مدونة قرأتها؟

لا فى كتير اوى

أفضل بوست؟
عامة انا بحب المواضيع اللى بتتكلم عن حياة شخص والمواقف اللى بتقابله
لان ده فى نظرى احسن طريقة ممكن نعيشها ونتعلم بيها

الشغل بالنسبة لك؟
بما انى فى مجال الطب
فاعتقد هو اكبر بكتير من ان يكون طريقة كسب مادى
فى الاساس ماكانش ده هدفى

الانترنت بالنسبة لك؟
وسيلة تفاعل واندماج
وبجد ابدا عمرى مابعتبره تسلية



ياه كل دى اسئلة
انا كتبتهم على مرتين على ماخلصت

وهاعملك زيك ياجميلة

التاج ده لكل الناس اللى عندى

Casper

Rona

قصائد مبعثرة

Noor El-madi

فارس قرطبة

حصان برى

sabsoob

طبعا اللى فاضى فيكم
بما ان كلكم تقريبا طب
فبراحتكم خالص

انا مش مستعجلة

ولو فيه اى حد مش متضاف عندى وله كومنتات يدخل ياخد التاج
براحته خالص


بس يبقى عليكم تاج
:)



posted by WiLdBiRd at 10:04 PM 20 comments

Wednesday, August 8, 2007

محضر غش

الحمد لله على كل شئ
فوجئت بالمراقبة واقفة جنبى فى الامتحان
وماسكة ورقة الاسئلة
وبتبص لى بصة وحشة اوى
عمر ماحد بصها لى فى حياتى
وبتقولى اية ده
مرت لحظة
اكتشفت
انى معرضة للاتهام بالغش فى الامتحان
لم تعنينى كلماتها او رأى من حولى فى
لان اولا الله يرانى
لكنى لقيت نفسى بقولها
لا
انا مش بغش
حضرتك ده خطى اولله
انا اللى كاتبة ده
طيب اسالى اللى حواليا
مش هاقولكم حالتى كانت عاملة ازاى
.....
نيجى بقى لاصل الموضوع
عندى عادة سيئة اوى
بس بصراحة اول مرة تعملى مشكلة
وهى القلم الرصاص
عادة بخطط فى ورقة الاسئلة بعض الحاجات اللى بتساعدنى فى الاجابة
بالذات لما يكون سؤال مش عارفاه
ولانى على طول بخرج من الامتحان بدرى اوى
فقولت لما استهبل واقعد شوية
كتبت سؤال كامل تقريبا فى ظهر الورقة
وقولت هاقعد شوية استريح وبعدين اكمله
والجو حر
وطبعا مافيش مراوح
وانا بستعمل ورقة الاسئلة اهوى بيها على نفسى
والمراقبة رايحة جاية تهزر معايا
تقولى يللا يمكن توقع عليكى اجابة ولا حاجة
وعادى
طلعت قدام ورجعت
لقت الهانم اللى كانت قاعدة فاضية
ماسكة ورقة الاسئلة ومكتوب على ضهرها بالرصاص
ونازلة نقش
الست يعنى غلطت
لازم تظن بيا سئ
مش بلومها ابدا
بس الموقف كل كان صعب عليا جدا
انك تتهم بحاجة ظلم
نتيجة سوء تفاهم
احساس الظلم وحش اوى
خصوصا لما تكون قاعد فى لجنة فيها ناس بتغش على عينك ياتاجر كده
طبعا هى تفهمت الموقف بعدها وطلبت منى انى امسح المكتوب
علشان ماينفعش برضوه
وبدات اكمل اجابتى للسؤال
بس اخدت نص ساعة بعدها وانا بكتب من اسوأ الاوقات فى حياتى
وكفاية كده بقى احسن هاعيط تانى
وانا ماصدقت نسيت
:)

posted by WiLdBiRd at 3:20 PM 14 comments