WiLdBiRd

Saturday, December 27, 2008

غنوة

البداية هى غنوة
والنهاية برضه غنوة
دمعة نزلت من حنين
تحكى انا مشتاقين
للنهار اللى جمعنا
ضحكة لمعت ليها عين
وابتسم ليها وجعنا
كل ده فى احساسل لغنوة

حتى أصوتنا اللى مالها فى الغنا
يوم نجمع بعضنا ونغنى غنوة
يضحك القلب الحزين
ينسى همه مع السنين
يفتكر كل الاغانى اللى سمعها
واللى عاشها
واللى كان ليها معا احلى ذكرى

غنوة حلوة قربتنا
غنوة تانية حيرتنا
غنوة بكتنا وغنوة فرحتنا
غنوة شوفنا فيها روحنا
واحدة نسيتنا جروحنا
غنوة يمكن مالها معنى
بس برضه ونستنا


غنوة وياها رجعنا
ننسى بيها اللى وجعنا
نفتكر ايام دلعنا
لما كنا صغيرين

غنوة صادقة بصوت حنون
عزفها كان ع القانون
غنوة وياها الجنون
بس مانستهاش فى يوم
اصل كان ليها حكاية
بدايتها هى غنوة
ونهايتها برضه غنوة
posted by WiLdBiRd at 11:50 AM 11 comments

Tuesday, December 9, 2008

الخروف بيقول اية؟



الاول كل سنة وانتم طيبين
ويارب تكونوا كلكم مبسوطين
اما طلبة الطب المطحونين
فمن بكرة للمذاكرة راجعين
ماتخدوش فى بالكم
ادعوا لنا بس
.
.
وبمناسبة العيد

.سألنا بنت خالتى الصغيرة
الخروف بيقول اية يارورو؟
بيقول خااااااااء
وده طبعا لانها لسه فى الحضانة
وبتتعلم الحروف
خاء ...خروف


الاطفال دول حاجة مش ممكن
فى ثوانى يخلوك تنسى اى حاجة فى الدنيا
وثوانى تانية يخلوك عاوز تنساهم
:)

يلا عيد سعيد عليكم
posted by WiLdBiRd at 12:11 AM 4 comments