WiLdBiRd

Monday, July 30, 2007

فضفضة



شوية فضفضة علشان انا تعبت

بحاول احافظ على هدوء اعصابى لان الوقت مايسمحش

باى تعب اعصاب

بكلم صحباتى وكل واحدة فيها اللى يكفيها

يمكن اخرها من شوية صاحبتى عاوزانى اقولها على حاجة مهدئة للاعصاب

او منوم علشان تعرف تنام



يمكن دى مش اتقل مادة فى طب

لسه فى السنة الجاية الجراحة والنساء

بس احنا فى السنة دى

اية الغم ده

استرس فظيع على كل الناس

بس انا بحاول اهدى نفسى واهديهم

بقول ان زيها زى اى امتحان وهتعدى برضوه زى اى امتحان

يمكن التعب الاكبر ان عندنا خمس ايام امتحان لنفس المادة متفرقة على شهر تمانية

مابين يومين نظرى

ويوم شفوى

ويوم جلدية

ويوم كلينيكال

بس انا بحاول اتجاهل ده واعيش كل يوم امتحان بيومه

اصل انا لو فكرت هتعب

ولو تعبت يبقى هاعجز بدرى السنة دى

وانا طول السنين اللى فاتت مطنشة وبوهم نفسى انى مش طالبة طب

وجايبة نتيجة كويسة

لسه شكلى يدى على طالبة ثانوية عامة

مش هاجى بقى اضغط على نفسى السنة دى

ويروح كل المجهود ده على الارض

هههههههه



بس الاحسن من ده كله بجد

انى عندى ثقة كبيرة اوى فى ربنا

ان ربنا مش هيضيع تعبى لا انا ولا اى حد من زمايلى

ربنا معانا

دعواتكم



posted by WiLdBiRd at 9:29 PM

17 Comments:

:D :D :D :D

بجد مش ممكن , الإنتري ده أكبر دليل على المحنة اللي كلنا فيها , لو بسيطي على البلوج بتاعي هتلاقيني لسه حاطط من يومين انتري بنفس الاسم : فضفضة و كان نفس السبب هو اللي خلاني اكتب
:D :D :D

لا بس بصراحة تامة الموضوع زاد عن حده قوي , انا مش متخيل ان لسه قدمنا شهر ونص

و الباطنة ما شاء الله متوصية بينا , من يومين كنت بفكر اني لما هخلص امتحانات الباطنة هكون عملت اكبر انجاز في حياتي

و اهم حاجة فعلا هدوء الاعصاب , عشان الواحد يعدي من غير خسائر جانبية يعني الواحد يجيله

stress ulcers , psychosis , convulsions , dementia , apathy
تبقى مشكلة , و خصوصا ان كل اللي حواليا بقه مستنيين فرصة عشان يقولولي : مش دخلت طب , اشرب بقه
هههههههههههه
بس انا مش هاسمح بده ان شاء الله

و ان شاء الله خير يا دكتورة اهم حاجة المعنويات و الاعصاب

ان الله لا يضيع اجر من أحسن عملا

July 31, 2007 at 3:17 AM  

ايه يا جماعة
تعبتوا اعصابي حرام عليكم

انتم اعملوا اللي عليكم وتوكلوا على المولى عز وجل
وخلوا ثقتكم ويقينكم به فقط

وان شاء الله ربنا يوفقكم

ربنا يكرمكم ان شاء الله

قلبي معاكم
وهاحلي الوالدة تدعيلكم ان شاء الله

July 31, 2007 at 6:16 PM  

asim:


انا كمان مش هاسمح لحد يقولى انتى اللى دخلتى طب
بالضغط العصبى اللى احنا كنا فيها

كويس ان اول ورقة خلصت

يوم من الايام الصعبة عدى

عقبال الباقى

:D

August 2, 2007 at 12:23 AM  

ما علينا:

الحمد لله احنا واثقين فى ربنا اكيد

ربنا يخليكى ويكرم ماما

قولى لها دعواتها هى وكل الامهات وصلت

:)

August 2, 2007 at 12:25 AM  

اصعب حاجة لما تشعر بضعف فى الناس اللى بتتسند بيهم
لم ابك يوم امتحان الشرعى بقدر ما بكيت اليوم اسفا عليكم وما حل بكم
وبصراحة لانكم انتم اللى كنتم بتقومونى دايما
سامحونى مش قادرة اقوم حد
ولا اقول كلمة
لانى بجد شفت غلبة القلق والتوتر اللى بيحطونا فيه فترة الامتحان الكبيييرة
مش اقدر غير انى اقولكم
تكالكم على الله
انا نفسى اضمك او تضمينى انتى فى حضنك هبة وابكى
ربنا يعينكم لما هو قادم
ربنا يوفقكم
ورب يخليكم ود.عاصم وكاسبر وكل اخواتى الاعزاء اللى بعزهم جدا خللى عودكم ثابت
وبلاش تحسسونى بضعفى بهذا الشكل
وربنا يكرمكم امييييييييين

August 2, 2007 at 2:44 AM  

السلام عليكم د هبه
كان الله في عونكم فيما أنتم فيه ومقبلون عليه
وبإذن الله يوم الأحد هيكون أحسن

أتمني لكم جميعا التوفيق

...رنا...

كفايه دموع بقه
أنا هعيط بسببك

August 2, 2007 at 6:11 AM  

Rana Degheidy:

اييييييييييية ده يارنا؟

انا اقدر اقولك دلوقتى ان ده عيب من عيوب النت خلى كل واحد يقول اللى جواه اوى

وكده هنبقى سبب فى اننا تعبناكم

بس الحق يتقال

انا نفسى تعرفوا الكلام ده من الاول علشان تاخدوا حذركم وتكونوا مستعدين

مش للقلق

لكن ازاى تواجهوا القلق


انا قولت على اكسيل انا مش زعلانة ابدا من الورقة الاولى

الحمد لله عدت على خير


وكمان ماكانش فيه ردود عليكى كتير وده شكله قلقك علشان بس الناس اكيد كانت بتستريح واكيد هيتشغلوا فى الورقة التانية


وربنا اكيد مش هيضيع تعبنا فيها

وهيعنيا ان شاء الله فى الباقى

وانا ان كنت شكيت او فضفضت هنا

فده مش علشان انا فقدت الامل

لكن علشان اقوى نفسى اكتر بيكم جنبى

وزى ماقال كاسبر احساس المشاركة

انى يبقى جنبى اخواتى وزمايلى واصحابى بالصورة دى صدقينى شئ يهون اى صعب

August 2, 2007 at 10:54 AM  

mahmoud farag:

وعليكم السلام بس بلاش دكتورة دى

انا لسه مشروع دكتورة

خليها وايلد بيرد
:)

صدقنى اللى عدى كان كويس

واللى جاى ان شاء الله هيكون احسن

وكله بيعدى

ربنا يخليكم على دعواتكم لينا بجد

اول حاجة هاعملها لما اخلص السنة دى انى احاول بجد اوصل الكلام ده ليكم
ياسنة خامسة الجديدة

من حقكم علينا زى مابتتعبوا معانا انكم تاخدوا خلاصة تجربة

حتى لو انا مش من اوائل الدفعة

بس ممكن تستفيدوا منى

لو مش فى المذاكرة يبقى فى موضوع القلق

August 2, 2007 at 10:58 AM  

علي فكره يا وايلد بيرد
انا شخصيا بستفيد جدا من كل الناس بس مش من أوائل الدفعات
((أصلي مش منهم خالص))
بجد نفسي بإذن الله لما تخلصوا علي خير مجموعه منكم ممن يبغون الصلاح يقعدوا يكتبوا عن طرق لتعديل التعليم الطبي .. أنا شايف انه عايز تعديل جاااااااااامد .. وعندي شوية أفكار حلوه جدا بس ادعي لي أخلص أنف وأذن الأول وأبقي خامسه زي ما بتقولي

**لو تحقق ان بعضكم فكر في افادتنا متخليش اوائل الدفعات يحضروا وإلا مش هحاول أطبق اللي هتقولوه

ربنا يوفقنا جميعا

August 2, 2007 at 4:27 PM  

عجبتنى كلمة اتقالت على المنتدى

الطب للجدعان

:D

لأ بس أنا بوعد الناس اللى بعدنا اننا هنفيدهم جامد ان شاء الله

لأن الخبرة اللى خدناها السنة دى كبيرة

بس للأسف جت متأخرة

:D

المهم ياريت دلوقتى النفسية تكون أحلى لأن نظرى الباطنة خلص

هييييييييييييييييييييييييييييييييه

August 6, 2007 at 2:36 PM  

This comment has been removed by the author.

August 6, 2007 at 2:36 PM  

mahmoud farag:

احنا مش عاوزين نزعل حد مننا

وبعدين مالهم الاوائل بقى

هو انت مش كنت منهم لما دخلت البتاعة دى اللى اسمها الطب

ولا اية

لكن علشان نكون عملين اكتر

ماينفعش بس الاوائل يتكلموا

لان مش كلنا هنبقى الاوائل

بس على الاقل عاوزين نكون متميزين

حتى لو مش بنجيب امتياز

نكون حابين الحاجة اللى بنعملها

او الحاجة اللى هنبقى عليها ان شاء الله

ويللا علشان فعلا انا بفكر جديا فى الموضوع

انا عادة لازم اعمل الكلام ده مع كل دفعة تدخل طب او اصغر منى من بلدى

قبل كده كنت بقعد معاهم فعلا اكبر وقت واى استفسار

لكن انى بقيت فى خامسة بقى فيه ناس كتير

يادوب يمكن نتقابل بس صدفة ونتكلم

August 6, 2007 at 5:34 PM  

Casper :

ايوة طبعا الطب للجدعان

واحنا مثال حى على كده

فات الكتير وباقى الكتير لسه

ربنا يعديها على خير

والنفسية بقت احسن للناس اللى كانت تعبانة

انا بتعب يوم الامتحان الصبح بس
لما بشوف القلق على الوجوه واحس انها خلاص قربت

لكن طول الايام

انا
كوووووووول خالص

August 6, 2007 at 5:37 PM  

هههههههههههههههههه
طيب واللي مزنوقين في جراحه وباطنه في نفس السنه
6 طب القاهره معك يا سيدتي
نظااااام قديم ودماغ حجريه للكليه

بس بيني وبينك هي الباطنه ومش هتشوفي لا قبلها ولا بعدها
وخصوصا انها اغلب شغل امتياز

وعلي فكره فيها برانشات لذيذه
كارديو مثلا ولا النيورو حاجات عسل عسل عسل
دي تفتح النفس علي المذاكره حتي
شدي حيلك ياهبه وكلنا لها

August 6, 2007 at 11:48 PM  

بجد
للحظة تخيلت حد هايسالني فين كارنيه نقابة الاطباء

انتم ناويين تعملوا تكتل طبي هنا ولا ايه

ربنا يوفقكم جميعا ان شاء الله

شوفي بقى يا دكتور
لما تروقي وفوقي
كدا

ليكي عندي
مجموعة اسئلة
اللي بيسموها تاج مش عارفة ليه
ابقى تعالي خديها

التاج منتظرك وقت ما تكوني فاضية

سلام
وربنا معاكم

August 7, 2007 at 6:22 PM  

حصان بري :

تشرفنا ياطب القاهرة

حالك من حالنا يعنى

لا وكمان جراحة

ربنا معاك ومعانا

من جهة فى حاجات لذيذةهو فيه

بس النفس

والوقت

:)

August 8, 2007 at 3:06 PM  

ما علينا:

معلش ظروف الامتحانات صعبة

وحلوة حكاية الكارنية دى

:)

استنى بس لما نخلص واحنا نسيكى احنا فى كلية اية

واية حكاية دكتور دى يادكتور علينا برضوه

:)

والتاج من عنايا انتى تامرى

فى اقرب فرصة اجاوبلك عليه ومش هحاول اخره ان شاء الله

August 8, 2007 at 3:10 PM  

Post a Comment

<< Home