WiLdBiRd
Wednesday, July 25, 2007
ملكة جمال
كان ليا حظ للمرة التانية انى اصادف احد مسابقات الجمال
بس دى مختلفة كتييييييير عن اللى قبلها
المرة دى
ملكة جمال الاخلاق
المسابقة اعدتها قناة
اقرأ الفضائية
طبعا فى غنى عن التعريف
الفكرة كانت ان المتقدمات للمسابقة
زى ماشوفنا الاسم
كان على اعتبار الاخلاق
تبقى ازاى دى؟
المفروض انهم بيحكوا مواقف اوقصص مروا بيها فى حياتهم
كان بيتوج القصص دى اخلاقهم
وتصرفاتهم فيها
دى كانت الفكرة الاولى للمسابقة
بس بعدها بقى اساس القصة
هو بر الوالدين
يعنى طبعا المسابقة ماكانتش معتمدة على الجمال الشكلى
ولكن نقدر نقول جمال الروح
فى نظرى الشئ الوحيد الضعيف فى المسابقة
هو طريقة الاشتراك
ان اللى بتحكى الموقف او القصة
هى الفتاة نفسها
الموضوع كده اعتقد فقد مصداقيته شوية
كان الاجمل ان والديها او اقاربها
او اصدقائها هما اللى يحكوا او يبعتوا يشتركوا لها فى المسابقة
كانت المسابقة هتكون اكثر قوة وجمال
ولو ان الخطوة نفسها جريئة وايجابية جدا
فى مواجهة مسابقات الجمال التجارية
وان كنت اختلفت معهم فى النقطة دى
لكن مافيش شك انى الفكرة نفسها عجبتنى جدا
وممكن تتنفذ باشكال تانية وتكون للافضل
نحو إعلام نظيف
وأفكار بناءة
دى وجهة نظرى
ياترى انتوا كمان رأيكم اية؟؟؟
posted by WiLdBiRd at 11:08 PM
17 Comments:
طبعا مضمون الفكرة
كون ان التمييز بين الناس عموما
مش البنات بس
يكون على اساس الاخلاق
دا شيء جميل
وقبل ما اوصل
في قرائتي لنقطة اعتراضك
نفس الاعتراض كان في دماغي
لاني مش شايفة ابدا
انه يعد من الاخلاق الطيبة
ان الانسان يعدد
في محاسن نفسه
الفكرة حلوة
بس زي انت ما قلت محتاجة
شكل مختلف لتنفيذها
مبروك على الشكل الجديد
تمام كده
شكل افكارنا واحدة
:)
يعنى هما ان البنات هما اللى يحكوا الحاجات دى
او تقول انا ببر بوالدى وتشترك فى المسابقة
كان الغرض منه عند بعضهم انهم يقدموا حاجة جميلة لاهلهم
بانهم يفوزوا فى مسابقة زى دى
لكن حسيت بس انها مش مقبولة منطقية
لكن البداية كويسة
محتاجة الدعم ولو حتى بالافكار
وتناقلها يمكن نوصل للاحسن
نورتينى ياقمر
الله يبارك فيكى
ده الخير على قدومك
بقالى كتييييير نفسى اغير التيمبلات واهو الحمد لله عرفت
مبروك اولا على الشكل الجديد للبلوج , تحفة من الاخر , و كمان متشكر جدا على لينك سبيسي في السايد بار
و بالنسبة للموضوع انا مشفتش البرنامج بس شفت الاعلان اكتر من مرة و الحقيقي عجبتني جدا الفكرة خصوصا ادام الكم الهائل من الاتجاه المعاكس تماما ليه على القنوات الاخرى , حقيقي خطوة تحسب للقناة و لو نجحت هتلاقي نص القنوات بكره بتقلدها , و يبقى الهدف اتحقق
انا معاكي في اعتراضك جدا و لو ده صحيح يبقى فعلا مشكلة للبرنامج , لأن برنامج بالشكل ده هيكون موضع انتقاد في كل كبيرة و صغيرة من كل وسائل الاعلام التي بتكسب من عكس الكلام ده تماما , فبالتالي المفروض كان القائمين عليه ياخدوا بالهم من حاجة زي كده , مش مجرد برنامج للم الناس و خلاص
بس على العموم انا عندي مبدأ دايما و هو تشجيع اي عمل يناقض الفن الردئ شبه الاباحي مهما كان سازج , لأن الاقبال على الاعمال الهادفه يؤدي في النهاية الى تطويرها و تشجيع المنافسة فيها و اكيد ده اللي احنا عايزينه في الاخر
انا اقترح عليكي اجة ايجابية انك تبعتي ملحوظتك دي للقناة من خلال موقعهم اكيد ممكن تفيدهم
بس اكيد مش دلوقت , لما نخلص من غول الباطنة و الاطفال
:D :D :D
اتمني تكون الامتحانات سهلى علينا جميعا
و اقوم بقه احسن انا حابس الغيلان في الاوضه و صوتهم علي اهو
:D
asim:
الله يكرمك ماتفكرنيش بالباطنة انا بحاول انسى الشوية اللى انا قاعداهم
على التيمبلات الله يبارك فيكى
والله كان نفسى اغيره من زمان بس الفلوس كانت مقصرة معايا شوية
اول مالفلوس جت غيرت العفش كله
بالنسبة للسايد بار لاشكر على واجب كان المفروض من بدرى
بس مش عندى وقت كفاية انى اقعد ادور واشوف دى بتتعمل ازاى
مش وقت التعلم ده
بالنسبة للمسابقة تمام كده كلنا متفقين فى نفس النقطة
عن الايجابية وارسال ايميل
علم ونفذ ياافندم
فعلا ده اللى جه فى بالى اول مابدات اقرا ردك
ولقيتك بتقوله فى الاخر
فقولت انفذ على طول
لان الحاجة اللى بتتاخر مش بتتعمل
حبيبتى
وسيدتى الرقيقة
والحالمة والمتابعة ايضا لملكات الجمال
:)
اهنيكى رغم استخدامك للنظام الشكلى القديم الا انه اجمل كما حاولت سابقا فى مدونتى بس انا استسهلت
بس هتتعبى فى اعادة التنسيق عشان الوان الخط
ولانى جايه اتخانق معاكى
من مبدا اسال مجرب
لانى شايفة حضرتك ناسية ان وراكى امتحانات
زى مانا عملت تمام
بس عشان خاطرى
لا عشان خاطر الاطفال اللى لسه وراكى
تحددى وقت لتصفحك
ربنا يوفقك
والحقيقة انا مش عاجبانى فكرة ملكة جمال الاخلاق اصلا
لانه مهما قيمت الاخلاق فستقيم على مبدا سطحى
سواء من النفس او الناس اللى حواليهم
لكن اخلاق اخلاق اللى جوه يعنى فدا محدش يعرفه الا المطلع على الخفايا سبحانه
وبعدين مش معنى انهم يعملوا حاجة تشد العالم وكونها مش كويسة ناخدها منهم بشكل تانى ونحاول نبدع فيه
لانها بجد مش هتكون منصفة ابداااااااا
والفارق انهم اخدوها بدرجات الجمال والرشاقة والاهم الثقافة والفكر
واحنا اخدناها من مبدا الاعجاب بالذات
تعاليمنا بتقول اننا لما نعمل حاجة طيبة نحتسبها عند المولى منجيش نقول دا انا عملت وعملت
يبقى بجد ولا عمل حاجة
بالتوفيق لكى وللجمييييييييييع
بصى يارونا اذا الفساد كتر فياريت مانبخلش على الحاجة الكويسة اننا نشجعها
يعنى مثلا لما تطلع اعلانات فى التلفزيون على تشجيع العبادات
زى صلاتى اهم شئ بحياتى مثلا
نقول الصلاة مش محتاجة اعلان تليفزيون
اى حاجة بتخدم الدين او بتخدم الاخلاق مطلوبة فى اى صورة من الصورة
وما لاياخذ كله لايترك جله
ولا اية
وبعدين مش احسن من اللى بيعمل ملكة الجمال بالمويهات وتقليد اعمى للغرب
ابدا مش الفكر ولا الثقافة زى مابتقولى
مافيش اى مانع اننا ناخد فكرة معينة ونوظفها صح تبعا لدينا وتقاليدنا وعاداتنا
واذا كان اهل الباطل بيدافعوا عن الباطل وبينشروه بكل الوسائل
فاحنا كمان مطلوب منا ندافع عن الحق وننشره بكل وسائل
واذا كانت المسابقة فكرتها من بره
اية المشكلة مادمت انا وظفتها صح بدون الاساءة ليا مع ماينفق مع دينى واخلاقى
والمختلفين فيه يستحق النقاش
اما على النت
حاضر ياماما مش هاقعد عليه كتييير
بس بتوحشونى بس بدخل اطمن
وباخد بريك
:)
السلام عليكم
طبعا مضمون الفكرة جميل بس محتاج للتنفيذ شوية ابداع
ياريت تغيرى لون الكتابة فى تدوينتك عنيا وجعتنى حرام عليكى
تحياتى
مبدئيا احب اقولك اني الحمد لله اتعميت علي اخر البوست
روز فاتح علي اخضر فاتح يا ظالمه
طبعا هو الانفتاح ده كله حلو مع الشمع والرومانسيه اللي مغرقين المدونه
بس عيني :)
نرجع للبوست
هو اصلا ماينفش تتعمل مسابقه للاخلاق
لان في الغالب بيكون فيه فقدان لجزء كبير من المصداقيه حتي لو اسرتها بتحكي
ده غير ان الحياء ( وهو اجمل الاخلاق في البنت الشرقيه) هيمنعها انها تروح مسابقه زي دي اصلا
يعني مثلا لو قدامك تروحي , هتروحي؟
اجمل ما في الاخلاق انها لا تنتظر رد الجميل
تحياتي يا وايلد بلو بيرد
اية ياجماعة ده
انا ماكنتش اقصد اللى طلع فى الالوان ده علشان غيرت شكل المدونة قريبة
رينا يخليكم مش عاوزة حد يدعى عليا
انا عندى امتحانات
:)
وليا عودة تانى ....
الجميلة wildbird
=================
اولا مبروك الشكل الجديد
ثانيا انتي سيبتي التيست بوست كدة لمين بعد ما عملتي الافتتاح؟
ثالثا بقى و ده الاهم
--------------------
الفكرة جميييلة جدا بجد و يا ريت بجد يتعمل حاجة زي كدة و اللي هتطلع الاولى هتجوزها ان شاء الله تبقى انعام سالوسة احلى منها حتى :))))))
طمنينيا على الامتحانات اخبارها ايه و الباطنة نظامها ايه معاكي شكلها قربت
دعواتي من القلب ليكي بالنجاح و التفوق ان شاء الله رب العالمين
وطمنينا دايما على اخبارك
و سلام مؤقت
اعذرونى على التاخير فى الرد
الطائر الحزين:
اولا اهلا بيك فى المدونة
علم ونفذ ياافندم تم تغير اللون وعدم استعمال الالوان دى مرة تانية
:)
حصان برى:
انت كمان عرفت اسمى بالكامل
;)
بس برضوه مش هقايض عليه
........
انا ممكن اكون بدافع عن البرنامج لانى شايفة انه تعزيز للاخلاق
وبالعكس هما بيحاولوا يقربوا من المصداقية
تفتكر لو ده مسلسل او فيلم بيقدم خلق او قيمة معينة
ماكناش هندور على مصداقية او نية الممثلين
كنا هنكتفى بالقيمة اللى قدموها ونتمنى انها تكون فى الحقيقة
الفرق طبعا ان ده برنامج واقعى من حياة ناس
S H A H:
الله يبارك فيك ياافندم
اولا الجميلة اللى برا دى صورة انا مستلفاها بس مش انا
:)
التيست بوست بتاعك ده انا ماليش دعوة بيه تانى
انا اللى كنت بأجج الفتنة وانا اللى هاسكتها احسن انت قلبتها علينا خالص
بالمناسبة انا كنت بقول ماعندكش شغل على الخميس والجمعة
.....
هو انت فاكرهم عملوا المسابقة علشان يتجوزوا فى الاخر
وبعدين دول بنات طيبة والصراحة انت لست ذلك الرجل الطيب
لامؤاخذة يعنى
الصراحة راحة
انا كنت عندك وشوفت
;)
...
ايوة انا مش عاوزة اليومين دول غير الدعوات اللى من القلب
ربنا يتقبل
غبت عن التعليق من فترة ولسة راجع
أولا مبروك الواجهة الجديدة للمدونة
ثانيا، الفكرة نفسها أكبر بكتير من مجرد إني برد وبقدم بديل، بمعنى إننا كأصحاب مرجعية إسلامية جت لنا حمى حاجة اسمها البرد والبديل الإسلامي وده شيء كويس بس مش على طول
يعني مثلا من أغاني سافلة وكليبات واطية لأغاني محترمة زي سامي يوسف، أو حتى ناس تانية مش بتغني بقضايا دينية بس محترمة، ده كويس آه، لكن مينفعش موجة الرد اللي تخلي المايوهات البيكيني يظهر قدامها مايوه إسلامي!!! ودلوقتي مسابقة ملكات الجمال يظهر قدامها ملكات الأخلاق وهي فكرة مبنية على الرياء لما واحدة ترشح نفسها تقول أنا عندي أخلاق ده يتعارض مع مبادئ إسلامية كتير
يعني هل مثلا خلال الشهور الجاية لمواجهة الأفلام الإباحية هيكون فيه بديل إسلامي تقدمه اقرأ؟ صعبة أوي دي!!! بس والله كدة مش بعيدة
غير إن قناة اقرأ بقت مثال للإعلام الساذج مش الهادف، مش عشان المذيعة لبست حجاب بقى خلاص سلوكها إسلامي بل بالعكس دي بقت ضحكتها مجلجلة ومكياجها صارخ وجلستها هيئتها مخجلة
بالنسبة لإعلانات مشاري فأنا بأيدها لأنها منسيتش المرجعية وبتدعو لحاجة في صلب الدين مش حاجة غلط زي المسابقات بتاعة اقرأ
والله طيب يا بيرد :(
التيست بوست ده فضحني خالص
بس جه كدة
وبعدين فتنة ايه بس متكبريش المواضيع كدة
ده الموضوع كله شوية كتاكيت و فراخ لزوم الشاورما بس
وغالبا اخر اليوم بعملهم شيش طاووق وباكلهم
والدعوات كلها من القلب خلاص
و ان شاء الله مع مرتبة الشرف كمان
امين
وسلام مؤقت
Amr Fahmy:
حمد لله على السلامة
الله يبارك فيك
بس مش وصلت لدرجة الرد على ماكل هو سئ بما اقل منه سوءا
هى محاولات
من حقك انك تقيم القناة كلها وتقول رأيك
بس انا مازلت عند راى قناة اقرأ بتقدم اعلام هادف
وان كنت لاترضى عن جزء منه
فده مش معناه ان ان القناة كلها سيئة
بالعكس برغم اللى قولته
هى مازلت بتقوم بدور فعال جدا
غير اى قناة تانية
S H A H:
انا مااقدرش اكبر مواضيع
انا فى امتحانات
ومحتاجة دعواتكم
:)
يبقى بلاش نزعلكم
وروح شوف الاكل اللى فى التيست بوست
احسن زمانه اتحرق
Post a Comment
<< Home