WiLdBiRd
Thursday, November 22, 2007
الروابط التى تجمعنا
هل الروابط اللى بتجمعنا لما نلاقى نفسنا
متشابهين مع بعض اوى
محض الصدفة
ولا بيخلقها عقلنا علشان نثبت اننا زى بعض
فى حاجة
اى حاجة والسلام
اوقات تكلم حد يقولك
انا مش لاقى حد زى
مش عارف اصاحب حد
مش عارف اتاقلم مع الناس
يعنى هو اللى خلقك ماخلقش زيك؟
فى قاعدة عندى بتقول
مدام انت موجود فى مكان
يبقى اكيد فى ناس زيك موجودين
هل لما يجمعنا الاتفاق يبقى احسن
ولا لما يجمعنا الاختلاف
زى اقطاب المغناطيس المختلفة تتجاذب
والمتشابهة تتنافر
ولا العلاقة اية
حتى فى الجواز
الاحسن انهم يكملوا بعض
يعنى هو هادى
وهى مجنونة
ولا يبقوا شبه بعض
ولا يمكن يزهقوا
.......
ايوة اسئلة كتير بتطرح قدامنا كل يوم
سواء فى علاقات الصداقة
او الارتباط
وكل واحد بيحاول يوضح لك ان وجهة نظره صح
posted by WiLdBiRd at 4:34 AM
30 Comments:
حلوه الاسئله دى
انا بحب المناقشه وضرب النار مووووت
علشان اوضحلك رأى
انا واخواتى مختلفين تماماااااااااااااااااااااااااااااااااااا
ومبنتفقش فى الرؤيه ولا الافكار ولا الاهتمامات نهائى
لكن رغم عن كده منساش مواقف فى حياتى عمرى ماكنت اتخيل انها تطلع منهم زى مثلا يوم ما النتيجه طلعت اختى كانت اول واحده عارفه وقاعدت تعيط و تقول مستحيل كأنها نتيجتها هى فى حين انها مبتحبش التعليم و معندهاش مانع تعيد السنه فى سنتين
قصدى ان الاختلاف مش مشكله
الاهم اننا نقبل بعض بالاختلاف ده
ده بالنسبه لكل الناس
تيجيلى بقى على الجواز
اقولك ومالو نختلف فى الطباع نختلف فى الذوق نختلف فى الاهتمامات
حلو قووووى ده اساسى علشان محدش يحس بالملل
لكن نختلف فى القيم والمبادئ والاهداف و الرؤيه
فده ابزوليوتلى
لا نمكن ابداااااااااااااااااا
وعلشان كده ابشرك بأنى حفتح بوست زى برايد اللى مش عاجبها العرسان وبتدور على عريس
This comment has been removed by the author.
جميل ياهبة شوية اسئلة فى التمام
المسألة مش بتبقى اللى خلقك مخلقش غيرك واكيد فى زيك بس اعتقد ان مفيش حد زى حد ميه فى الميه يعنى اعرف ان التوائم بيبقوا مختلفين فما بالك بالناس الغريبة عن بعضها بس فى ناس قريبين اوى من شخصية بعض
بس ممكن مايتقابلوش
احنا ياما بنقابل كل يوم ناس وبشر بعدد شعر راسنا (يعنى لو خفيف شوية ) بس مش بندقق فى كل الناس
لان الدنيا تلاهى وممكن انا قدامى حد
كويس جدا ومناسب لشخصيتى جدا
وانا مش واخده بالى وهو كمان
بحس ان اللقاء بين 2 مناسبين ده معجزة صغيرة مش دايما بتحصل ومش لكل الناس
وبالنسبة لمسألة الارتباط دى
انتى طرقتى وتر حساس كأنك قريتى اللى كنت بفكر فيه ده موضوع فعلا لازم اخد فيه قرار اليومين دول ومش عارفة بردوا
ياترى مفروض نكون مختلفين ولا نبقى متقاربين من شخصيات بعض
؟
واعرف منين اصلا شخصية اللى قدامى بس الحقيقية مش شرط اصدق اللى قالهولى
ياريت ياهوبة اما تلاقى جواب تقوليهولى
عشان انا اخر واحدة عندى خبرة فى الحكاية دى
!!!!!!!!
سلامى ليكى ياقمر
ابتدى استعدى للكلية
وبلاش شقاوة
ضرب النار
ليه يابنتى الاذية دى بس؟
انتى عارفة الاخوات انا مااقدرش اجيب سيرتهم
لانهم خارج المقارنة
مهما كنا مختلفين فاحنا اخوات فى الاخر
تعالى بقى للجواز
المبادئ مافيش عليها اختلاف
بس انا بقصد الاختلافات اللى ممكن نبقى شايفينها اختلافات بسيطة
وبعدين يبقى فيها ضرب نار بجد زى مابتقولى
ولو هتعملى زى برايد قوليلى
علشان عندى شوية كلام عاوزة اطلعه فى الموضوع ده
بس انتى عارفةانى فيمس على النت
;)
something like love:
ايوة ماهو احنا مش ورانا حاجة غير اننا نقعد نتساءل
بصى ياستى
هو انتى تلاقى اتنين اتجوزوا مختلفين تمام فى الطباع او الشخصية
الناس تقولك كويس اوى كده هيكملوا بعض
ولو اتنين شكل بعض اوى حتى فى الشكل
يقولك سبحان الله اتخلقوا لبعض
يعنى فى الاخر الموضوع
احنا اللى بنحددها
يمكن من قبلها بتبقى فيه رؤية او صورة فى دماغك انتى محدداها
بس فى الاخر لما تحصل حاجة ممكن الاوضاع تختلف
وساعتها النصيب لها الكلمة الاولى والاخيرة
:)
فى رأيى ان اللى بيصنع الألفة والحب بين الناس مهما كانت علاقتهم ببعض هو الالتقاء فى نقاط الحوار
تعالو مثلا نمثل اتجاهات الحور بالمتجهات بتاعة الهندسة التحليلية
لو اتنين فكرهم زى بعض ومتطابق هتلاقى الحوار مابينهم ماشى فى خطين متوازيين
يعنى باختصار عمرهم ماهيتقابلو
صحيح بتبقى الفكرة نفسها مذهلة فى الأول انك تلاقى توأم روحك لكن بمرور الوقت الملل بيظهر وبيبقى أصعب أنواع الملل لأنه صعب التخلص منه
لكن لو اتنين فكرهم متغير شوية عن بعض , أكيد هيتقابلو فى نقاط كتير وهيحصل حوار وتفاهم اذا كل واحد التزم بآداب الحوار
لأن الألفة والمودة بتيجى أساسا كلما تعمقت فى معرفة الشخص الذى أمامك , فاذا كانت له نفس أفكارك وشخصيتك , فأنت تعرفها مسبقا فان المودة تكون فى أضعف حالاتها لأن احتمال الملل القريب موجود
وده بيأكد المثل القديم
:اذا كنت تحب صدر الدجاجة فتزوج ممن لا يحبه
والحمد لله ان التطابق ده مستحيل عمليا
حتى لو موجود برضه مستحيل يحصل لأنه (باستخدام الهندسة التحليلية برضه) هتكونو عاملين زى اتنين واقفين على طرفى قطر فى دائرة , اذا اتحرك واحد بحثا عن التانى , تحرك الثانى فى نفس الوقت فى الاتجاه المعاكس فكان اللقاء مستحيلا
عشان كده رأيى ان مش مهم كون فيه اختلاف بينك وبين أى شخص حتى لو كان شريك حياتك , المهم ان يكون عندك وعنده العقلية التى تقبل الاختلاف مادمنا قد ابتعدنا عن الثوابت كاحترام الدين مثلا
الاختلاف = تكامل
والاختلاف أساس الحياة الاجتماعية السليمة
(وجعلكم شعوبا وقبائل لتعارفوا)
المهم , العقلية التى تقبل الاختلاف
وده فصل كامل فى كتاب شلتنا المجيدة المختلفة تمامااااااا فى أفكارها (التعايش مع الاختلاف)
موضوع راااااااااااااااااائع بجد
مستنيين زيه كتير
Casper
المهم ان يكون عندك وعنده العقلية التى تقبل الاختلاف مادمنا قد ابتعدنا عن الثوابت كاحترام الدين مثلا
كلام جميل جدا
تمام يبقى مش مهم نختلف او نبقى زى بعض
المهم لو فيه اختلاف نتقبله
:)
كلام محترم جدا والله بجد ارء بنائة ياجماعة وموضوعك ده افادنى اكتر مما تتصورى ياهبة
وشكرا على رايك دكتور كاسبر
الكلام كبير اوى بصراحة
بس ايه حكاية الهندسة المرجانية دى؟؟؟؟
مش بقولك جامدة ياهبة كل ماافكر فى حاجة واحتاجها الاقيكى موجودة تساعدينى ياجميل
مش عارفة انتى ملاك بقى ولا ايه؟
""هل الروابط اللى بتجمعنا لما نلاقى نفسنا
متشابهين مع بعض اوى
محض الصدفة
ولا بيخلقها عقلنا علشان نثبت اننا زى بعض فى حاجة""
انا شخصياً بلاقيها محض صدفة
لكن من تعاملي مع الناس لقيت من حوالي كتير عقلهم بيخلق لهم روابط زي دي
فالنوعين موجودين و عدوا علي
""اوقات تكلم حد يقولك
انا مش لاقى حد زى""
ده غالباً بيكون من النوع الاولاني و اللي فعلاً من محض صدفة التشابه بينه و بين غيره بيحاول ينفيها
""مش عارف اصاحب حد
مش عارف اتاقلم مع الناس""
ده بقى عيب عنده
""يعنى هو اللى خلقك ماخلقش زيك؟""
انا مؤمن بكده و الا كان ربنا خلانا زي البكتيريا بنتناسخ
كل انسان له الحق ان يكون مختلف عن اي انسان اخر و عشان كده انا ضد الاستنساخ من خلال وجهة النظر دي
""فى قاعدة عندى بتقول
مدام انت موجود فى مكان
يبقى اكيد فى ناس زيك موجودين""
أكيد فيه ناس زيه موجودين بس لازم بيكون فيه اختلاف جوهري بين أي اتنين مهما كانوا متشابهين
ده التوائم بتبقى بصماتهم مختلفه يبقى اكيد الارواح و العقليات بتختلف بين البشر
""هل لما يجمعنا الاتفاق يبقى احسن
ولا لما يجمعنا الاختلاف""
دي في رأيي بتتوقف على الاتنين أو الجماعة اللي هيجمعهم الاتفاق او الاختلاف
و لكن يجب ان يكون هناك اتفاق على النقاط الجوهرية التي لا يصح فيها الاختلاف و بعد كده مش مهم الاختلاف في التفاصيل مادام بتصب في نفس المصب
حاجه كده زي ما احنا ما بنقول ان اختلاف المذاهب رحمة لكنها كلها متفقة في الأصول
""ايوة اسئلة كتير بتطرح قدامنا كل يوم
سواء فى علاقات الصداقة
او الارتباط
وكل واحد بيحاول يوضح لك ان وجهة نظره صح""
دي طبيعة الانسان انه كبريائه بيمنعه من تخطئ نفسه و مادام حاجه مفيهاش رأي حازم و الموضوع كله و جهات نظر يبقى كل شئ وارد
موضوع جميل ياهبه فعلا
بالنسبه للاصحاب
بالتاكيد مفيش حد زي التاني بالظبط
لكن بردو ساعات كتير بيبقى في حاجات مشتركه
ياعني مثلا احنا بنتعامل مع ناس كتير لكن لما نفكر كده
اشمعنا مثلا في مجموعه معينه بس هيه اللي بنروح ونيجي معاها ياعني اقصد قريبين لبعض
مجموعه ياعني مرتبطين دايما ودايما بنسال على بعض بالعربي اصدقاء
لو جينا فكرنا كده اشمعنا احنا كلنا اتالفنا مع بعض وكونا مجموعه جميله مع اننا ساعات بنكون مختلفين
عن نفسي ياهبه انا واصحابي في الكليه مجموعه كده ربنا يبارك اكتر من خمستاشر بنوته
من سنه أولى واحنا مع بعض وبنقعد في الصفه الاولى دايما محجوزه لينا
بنبقى سعداء جدا لما بنروح المحاضره بنحس بوحدتنا كده
وماينفعش حد يقعد بعيد عننا مع اننا اغلبنا مش من روند واحد واخدين كل الروندات
كل روند فيه مجموعه الا الروند بتاعي انا اللي لوحدي فيه
المهم لو جيتي تشوفينا كلنا مختلفين عن بعض في حاجات كتير كان اسلوب مذاكره او طريقه الحياه نفسها
صحيح في مننا مرتبط اكتر ببعض او بالمعني متشابه في حاجات كتير وعلشان كده تلاقينا ساعات ثنائيات
لكن بردو لازم نكون مع بعض اتعودنا على بعض بقالنا خمس سنين
لما حد بيغيب عننا كان باه كورس او سفر بنبقى هنموت ونشوفه لان في رابطه بالفعل بتربطنا
صحيح في اختلاف بس في حاجه اهم هيه الروح الطيبه اللي بيناالانجذاب الرباني اللي اتخلق لما شوفنا بعض لاول مره
حاجه كده ياهبه ماينفعش تتقال بالكلام او تتكتب لكن بتتحس لا شعوريه
وده من رايي اهم من اي حاجه والاحساس ده هو اللي بيجمعنا ببعض هو اللي بيخلينا بدون شعور مضطربين لما مانقعدش جنب بعض لما حد يغيب عننا فتره حتى لو كنا معاه بالتليفون لكن ماشفناهوش وماتلمش في وسطنا
نيجي باه للارتباط والحياه الجديده عند كل انسان مننا ولد او بنت
بالتاكيد الارتباط شيء مش هين ولازم التاني فيه
لانها حياه باكملها مش لعب عيال
وبالتالي فصعب اقول ان لازم يكونو مختلفين او متشابهين
انا بحثت عن الموضوع ده لاني فعلا شغوفه اني اعرف اكتر
ووصلت لنفس رايي السابق ان لازم يكون في روح كده او مغناطيس يجذب المرتبطين
لو جينا سالنا كل واحد مننا ايه مواصفات شريك عمرك هنلاقي كلام كتير ومختلف اكيد تبعا لالولويات كل واحد في حياته واللي عندي اهم حاجه عندك مش مهم
لكن ساعات كتير واحد يقول عايز ايه واحده فيها كذا وكذا وكذا حاجات كتير وفي نفس الوقت التانيه بتقول النقيض بردو وتلاقيهم في الاخر مجرد اما اتقابلو واتعرفو على بعض اندمجو بشكل رهيب وبدون شعور منهم كل واحد اتخلا عن مطالبه
دي باه التالف القدري الرباني اللي خلقه ربنا سبحانه وتعالى فيهم الاتنين
وعلى فكره ده يمشي بردو مع اللي افكارهم متساويه وميولهم واحده
والتالف ده ياهبه هو اللي بيزيد ارتباطهم ببعض اكتر طول حياتهم
بدام عندهم قدر من الذكاء المتكامل اللي بيه بيحافظو على هدية ربنا ليهم
ايوه هديه مهو التالف الاولاني ده هديه من ربنا
وفي نظري لو كلا الطرفين كانو باه مختلفين او متشابهين عرفو صح وقدرو قيمة الهديه دي وعرفو ازاي يحافظو عليها وينموها صح ويروها بدفء
اكيد هيكونو خليه قمه في الروعه وحياه كريمه ليهم ولاولادهم
ده رايي
وميرسي تاني على طرح الموضوع وعلى اراء الزملاء
something like love:
ياجميل انتى تأمرى اى حاجة تفكرى فيها نناقشها على طول
وعندك بقى او عندى
واحد
zi.One
فعلا يعنى انت لقيت زى ان النوعين موجودين
التشابه الفعلى او محاولات خلق الراوبط
وانا ماكنتش بالقصد بالتشابه انهم يبقوا متطابقين
لكن دايما لازم يكون فيه اختلاف بسيط
وانت قولت التوائم حتى عمرهم مابيكونوا متشابهين 100 فى ال 100
Nor Ala Nor:
منورة ياقمر
وكلامك جميل اوى
شوفى برضه انتوا مجموعة اصحاب كبيرة
ومااعتقدش التشابه بينكم هيبقى فى نقط كتير اوى
بس انتوا محافظين على الصداقة دى
ومااعتقدش انها ابدا قائمة على المصلحة ولا ماكنتم استمريتم السنين دى
وبرضه من المجموعة الكبيرة بتلاقي الاشخاص بتتجاذب اكتر وتبقوا ثنائيات
:)
Something like love:
بلاش حكاية (مرجانية) دى عشان بتعملى حساسية
:D
شكرا جزيلا على التعليق الرقيق
---------
بقوللك ايه يا هبة احنا استفدنا كتير أوى من الموضوع ده
ماتجمعى الآراء وتعمليها فى ملف ونطبعها كتاب ونبيعه نكسب كلنا؟؟
موضوع جميل
بالنسبة لمقولة
""يعنى هو اللى خلقك ماخلقش زيك
ايوة ما فيش حد زي التاني كل واحد
unique بحد ذاته
اما مسالة التشابه والاختلاف
اعتقد ان حتى مدى الاختلاف احنا اللي
بنحدده مع الاخرين لا شعوريا
يعني انا من الناس اللي بيستهويني
الاختلاف كحالة فيها ثراء وتنوع انساني
ولكن فيه اختلاف خارج تماما عن دائرتي
مستحيل اتاقلم معاه
Casper:
يارب تفضل منور المدونة كده دايما
اما عن الكتاب فلما اخلص سلسلة العلاقات الانسانية
;)
UNIQUE:
كنت بقصد بزيك هى بعض التشابه اللى بين شخصية والتانية
ممكن حتى لو ظاهرانهم متطابقين
لازم يكون فيه اختلاف
لو نزلتى لاول المدونة
هتلاقى انى اتفق معاكى
فى ان انا او انتى واى انسان
unique
ياunique
شرفتى المدونة
:)
حلو الموضوع
وشكله فتح مناقشات جامده جدا
رأيي الخاص
انه مش مهم تلاقي اللي زيك بالظبط .. لازم الملل هييجي يدخل بينكم لأنه ببساطه مفيش حاجه تقدموها لبعض
انما الأحسن انك تلاقي اللي يكملك
يعني مثلا واحد مش اجتماعي ومثقف جدا اتصاحب علي واحد اجتماعي جدا ولكن غير مثقف بالمره
لازم في يوم انهم هيتبادلوا المعارف اللي عند كل واحد فيهم ولاتنين يبقوا ماشيين في الطريق الصح وهو الجمع بين أكثر من صفه
الكلام اللي فات يبقي كويس قوي في الصداقه لأنه هيخليها تدوم أطول
أما في الجواز والحب وكده فلازم يكون هناك رابط من نوع ما بين الطرفين ... حبهم لشئ واحد مثلا .. اتجاهاتهم متقاربه .. ثقافتهم متقاربه .. البيئه والتربيه في نطاق واحد ...
كل ده هيخليهم يقربوا من بعض أكتر ويستمر الوفاق بينهما ده بالنسبه لأفكارهم أنما الاهتمامات والأفعال لو كلها شبه بعضها فأقدر أقول لك انهم هيزهقوا من تكرارهم بسرعه لأنهم كل واحد هيشوف أفعاله مرآه للتاني .... وده هيبعث علي الملل وربنا يستر بعد كده
ده رأيي والله أعلم ومنتظر بقية السلسله
بس انا عندى مبدأ
لولا اختلاف الاذواق لبارت السلع
هو يعنى مش انا الى مخترعاه لا ده مقتبساه من كتاب الاقتصاد بتاع ثالثه ثانوى
:)
المهم ياستى اولا بالنسبه للاصحاب وشريك الحياه زى ما اتروبينا قالت ان الاختلاف اهم حاجه ميكونش فى المبدأ
لكن مفيش مانع من اختلاف وجهات النظر
انا اصلا لو كل اصحابى بيفكروا زى يبقى اخر ملل وكمان تكون الدنيا خربت
فاحسن حاجه الاختلاف علشان يبقى فيه حاجه اصلا نتكلم عليها ونتناقش فيها
يعنى ماما مثلا اسماعيلويه وبابا اهلوى متعصب
لو كده مكنوش اتجوزا
بس لا اتجوزوا ومطلعين عنا احنا بقى لما ييجى متش
اصلا بعيد عنك كلنا اسماعلويه ما عدا بابا
:)
خلاصت ده كله يعنى
ان الاختلاف هو متعه وجوهر الحياه
يالا سلام ياقمر
ومعلش ياجميل متزعليش على التأخير
بس والله ظروفى كانت وحشه الايام الى فاتت
وكمان كان عندى امتحان
مش قادرة اقولكم سعادتى بتعليقاتكم جميعا
بالرغم من حتى الاختلاف البسيط فى آرانا
الا انها فعلا وضحت لى
اختلفت الاسباب و.....الارتباط واحد
mahmoud farag:
انت متفقة فان لازم يبقى فيه اختلاف
بس انا مش معاك فى انه يكون بعد السما من العمى كده زى مابيقولوا
واحد مثقف وواحد مايعرفش حاجة ولا اية؟
اما فى الجواز فاعتقد التشابه اوقات بيخليهم يقروا بعض اكتر
يعنى يبقوا فاهمين بعض
وده راى برضه والله اعلم
:)
dr.nour:
اعتقدت انه ده حديث عن الرسول عليه الصلاة والسلام
اذا الاختلاف هيخلى مافيش ملل
ويكسر الروتين
بس حتى واحنا مختلفين متعايشين
وبعدين نص الشعب المصرى مختلفين فى الكورة
بسيطة ياستى
وانا مااقدرش ازعل منك
ربنا يعينك ويوفقك فى الامتحانات
المهم انى تعليقك ورايك نورنى فى النهاية
والله انا مقتنعه جدا
ان كل متشابه متنافر وكل مختلف متجاذب
التكامل والتطابق
هناك اشياء ينبغى فيها التطابق
واخرى تحتاج التكامل
لكن الفيصل فى التكافؤ
عقدتها صح؟
رينـــــــــــا:
سيبك من اى حاجة قولناه
اهم حاجة انك مقتنعة جدا
وده المهم بس اوعى تيجى تغيرى رأيك تانى
:)
نورتى المدونة
الطائر الحزين:
لا ابدا عقدتها اية
هى معقدة لوحدها
والا ماكان طرح التساؤل
فى النهاية
ان جمعنا الاختلاف فلنتقبله ونحترمه
وان جمعنا التشابه فليكن تشابه بلا ملل
تحية ل د.هبة على طرح هذا الموضوع القيم
بالنسبة للاختلاف..فلابد من تحديد المدى الذى من الممكن ان نختلف فية
بمعنى..ممكن نختلف فى اهتماماتنا الفرعيه"الرياضة مثلا"لكن هل ممكن نختلف فى حاجة زى الحجاب مثلا؟؟؟
لا يمكن..بالنسبة لى على الاقل
بالنسبة للأصدقاء..المجال مفتوح أكتر جدا
و وجود هذا الاختلاف يعطى تكامل لمجموعه الأصدقاء
تحية مرة أخرى لأسلوب العرض الجيد و آراء الزملاء الأفاضل
lawla e7'tlaf el azwak la barat el sela3 :D .... lazm na7'talef ... 7atta law fe kol 7aga ... lazm..na7'talef fe weghat nazar na7'tlef fe teba3 na7'talf fe solokeyat...mafesh 7ad zay el tany :)...
der Kaiser
تحية ليك انت د.أحمد على تعليقك
مش عارفة انا بحس ان الارتباط لازم يكون قريب من الصداقة
يبقى اللى يمشى عليهم واحد
:)
sabsoob:
سعيدة بعودتك لعالم التدوين
واذا كان مافيش حد زى حد
فيمكن فيه تقارب يجمعنا
:)
Post a Comment
<< Home